పోస్ట్ పెయిడ్ యూజర్ల కోసం ఎయిర్ టెల్ కొత్త సర్వీసు

ప్రముఖ టెలికాం సంస్థ భారతీ ఎయిర్‌టెల్ తమ పోస్ట్‌ పెయిడ్ కస్టమర్ల కోసం 'ప్రయారిటీ పోస్ట్‌ పెయిడ్' పేరుతో ఒక సరికొత్త ప్రీమియం సేవను ప్రారంభించింది. దేశంలోనే తొలిసారిగా రిటైల్ వినియోగదారుల కోసం 5G నెట్‌వర్క్ స్లైసింగ్ టెక్నాలజీని వాణిజ్యపరంగా అందుబాటులోకి తీసుకురావడం దీని ప్రత్యేకత. మంగళవారం ఈ సేవలను కంపెనీ అధికారికంగా ప్రకటించింది.

రద్దీగా ఉండే ప్రాంతాల్లో, నెట్‌వర్క్‌‌పై అధిక లోడ్ ఉన్నప్పుడు కూడా అంతరాయం లేని, స్థిరమైన కనెక్టివిటీని అందించడమే ఈ సేవ ప్రధాన ఉద్దేశం. దీని కోసం 'ఫాస్ట్‌ లేన్ టెక్నాలజీ'గా పిలుస్తున్న 5G నెట్‌వర్క్ స్లైసింగ్ విధానాన్ని వాడుతున్నారు. ఈ టెక్నాలజీతో ప్రయారిటీ కస్టమర్ల కోసం నెట్‌వర్క్‌‌లో ఒక ప్రత్యేక వర్చువల్ లేన్‌ను కేటాయిస్తారు. దీనివల్ల రద్దీ ప్రదేశాల్లో సైతం కాల్ డ్రాప్స్, నెమ్మదించే డేటా స్పీడ్ వంటి సమస్యలు తగ్గుతాయని ఎయిర్‌టెల్ హామీ ఇస్తోంది.

ఈ సందర్భంగా ఎయిర్‌టెల్ ఇండియా ఎండీ, సీఈఓ శశ్వత్ శర్మ మాట్లాడుతూ.. "మా కస్టమర్లకు మెరుగైన, నమ్మకమైన అనుభవాన్ని అందించడమే మా లక్ష్యం. వారు ట్రాఫిక్‌లో క్లయింట్ కాల్ మాట్లాడినా, జనసమ్మర్థం ఉన్నచోట స్ట్రీమింగ్ చేసినా, ఈ 5G స్లైసింగ్ టెక్నాలజీతో వస్తున్న ప్రయారిటీ పోస్ట్‌ పెయిడ్ సేవలు ఉత్తమ అనుభూతిని ఇస్తాయి" అని వివరించారు.

ప్రస్తుతం ఉన్న పోస్ట్‌ పెయిడ్ కస్టమర్లందరికీ ఈ ప్రయారిటీ ప్రయోజనాలను అదనపు ఛార్జీలు లేకుండా ఆటోమేటిక్‌గా అప్‌గ్రేడ్ చేస్తారు. వ్యక్తిగత ప్లాన్లు రూ.449 (GST అదనం) నుంచి ప్రారంభమవుతాయి. ఈ సేవలు పొందాలంటే లేటెస్ట్ సాఫ్ట్‌‌వేర్‌‌తో కూడిన 5G స్టాండలోన్ (SA) ఎనేబుల్డ్ స్మార్ట్‌‌ఫోన్ అవసరం.